Los xuegos tradicionales
Primero de que llegare la televisión y los xuguetes actuales, la rapacería deprendía los xuegos de güeles, güelos, padres y madres o imitábenlos d’otros rapazos. Los xuegos son en sí mesmos una actividá placentera pa la persona que los prautica, son motivadores y creativos y favorecen la imaxinación. Aparte d’estes cualidaes hai otra que merez una mención mui especial nel mundu individualista nel que vivimos: el xuegu ye socializador por demás, favorez la cooperación, la convivencia y el trabayu n’equipu. Per otru llau’l xuegu ye tamién una ferramienta fundamental a la hora de desarrollar el potencial físicu ya intelectual, porque se prautiquen habilidaes manuales y llingüístiques.
¿POR QUÉ HAI QUE CONSERVAR LOS NUESOS XUEGOS?
Preservar el conocimientu sobre los nuesos xuegos ye fundamental nel desarrollu cultural de la nuesa sociedá. Los xuegos son manifestaciones autóctones de la cultura popular d’una bayura estraordinaria. Son parte esencial de la nuesa cultura. Per otru llau, ameyoren el nuesu tiempu llibre, aumenten el respetu hacia lo propio, ayuden a les rellaciones sociales de les persones y mui esencialmente de neños y de la mocedá y permiten conocer meyor la cultura propia y, poro, valorala.
1. PRIMERO DE XUGAR: RIFAR Y SORTIAR:
Si son interesantes los xuegos, tovía más lo son los procesos previos al propiu xuegu, yá que toca escoyer quién xuega o qué equipos se van formar.
Un sistema mui simple d’elección foi siempre echalo a cara o cruz. Otra forma mui peculiar n’Asturies consistía en garrar un cachu teya que se moyaba cola saliva y tirábase al aire. Dempués dicíase “¿pan o vinu?” y ganaba quien acertara. Obviamente “vinu” correspondíase cola cara moyada y “pan” cola seca. Tamién s’usaba’l métodu d’esconder una piedra nun puñu y aldovinar en qué mano taba. Otra forma d’escoyer yera que dos neños puestos ún enfrente del otru diben avanzando con un pie pegáu delantre del otru y el que llograba montar el pie sobre’l del otru ganaba’l drechu a elixir a los xugadores o empecipiar enantes nel xuegu.
Tamién alcontramos davezu cantarinos divertíos que s’usaben pa escoyer, salvar o eliminar a daquién d’un xuegu.
UNA DOLE
Una, dole, tele, catole,
Quile, quilete,
Estando la reina en su gabinete,
Vino quilín, vino quilón,
Cuenta las 20 que 20 son,
L, J, Justicia y Ladrón
2. LOS NUESOS XUEGOS:
Son tantos que ye difícil facer una esbilla afayadiza. Pa nun resultar cafiante voi escoyer unos pocos. Si daquién tuviera perinteresáu o perinteresada dexo equí l’enllaz:
· LOS BOLOS
Esti ye ensin dulda’l xuegu más conocíu de tolos de la tradición asturiana y pasó yá a formar parte del grupu de los deportes tradicionales modernos.
Intentar asignar un orixe precisu al xuegu de los bolos ye mui difícil, yá que la procedencia pue ser celta, romana o xermana. Paez que nel so orixe usábense como preparación pa la guerra, p’adiestrar los músculos, el pulsu y la puntería, como exercicios de llanzamientu.
N’Asturies prautíquense varies modalidaes: la cuatriada, el birlle, los bolos de Saliencia, el batiente rodáu, los bolos de Tinéu o bolu celta y el bolu vaqueiru o pasabolos de Cangas de Narcea. Vamos ver dos d’ellos.
Cuatriada: (zona centru y parte de la oriental d’Asturies). Consiste en llanzar una bola pel aire hasta la zona de bolos o castru, intentando parar la bola, cuatriala y valtar los bolos. Son 9 bolos grandes y ún más pequeñu llamáu "biche", colocaos formando un cuadráu en 3 files de 3, y el "biche", bien a la izquierda o bien a la drecha de los demás. La complexidá d’esti deporte, que ye muncha, determínala la situación del "biche".
Les xugaes principales son les siguientes:
1. Si la bola pasa pela caxa (cuadráu formáu polos bolos) ensin valtar nengún bolu val 3 puntos o bolos y 3 más si para dientro d’ella.
2. Si se valta dalgún bolu val un puntu más por cada bolu valtáu, nun siendo’l biche, que val 4 bolos más.
3. Si se valta’l bolu del centru’l primeru, el valor ye de 2 bolos.
Batiente rodáu: (Carreño, Gozón, Avilés, Castrillón, Sotu’l Barcu, Candamu, Pravia, Salas, Grau, Cuideiru y Valdés). Considérasela la modalidá más antigua de les prauticaes n’Asturies. El tiru ye dinámicu: trátase de garrar carrera (máximo 15 metros) cola bola garrada ente la palma la mano, la moñeca y l’antebrazu y llanzar la bola rodando pel "rodáu" (espaciu de superficie llisa de 13 a 32 metros). N’acabando’l rodáu la bola va llegar con muncha fuercia a la "llosera" o zona de bolos. L’oxetivu d’esti llanzamientu ye intentar valtar el mayor númberu de bolos y, amás, faer que del golpe dau a los bolos estos vuelen percima del "ciebu" (valla de 2 metros d’altura separada 4 metros de la llosera). La valoración de les xugaes ye la siguiente: cada bolu valtáu na llosera val un puntu, 10 puntos o bolos los que queden ente la llosera y el ciebu y 50 puntos los que superen l’altura del ciebu.
· CARRERES
A caballu: ún de los xugadores xube “a caballu” del otru y, partiendo d’esta situación, pue xugase a carreres,cambiando o non alternativamente de “caballu”; o a emburriase, cola finalidá de que’l xugador que tea xubíu a recostines d’otra pareya caiga y pierda.
De madreñes: carreres calzaos con madreñes. Descalifícase al qu’en dalgún momentu del percorríu pierda dalguna de les madreñes.
De sacos: percorrer una distancia lo más rápido posible coles dos piernes dientro d’un sacu. La salida podía dase llanzando al aire una piedra y, de la qu’ésta tocaba’l suelu, los participantes escomenzaben la carrera.
A recostines:trátase de caltener l’equilibriu llevando a un compañeru a recostines.
De veles: carrera a lo llargo d’un percorríu con una vela encensa na mano, evitando que s’apague. Nun se permitía protexer la llama cola mano.
Tamién hai carreres de llecheres, panoyes...
· LA LLAVE
El xuegu de la llave básase en llanzar seis fiches de fierro acerao consecutivamente dende la zona de tiru, apuntando pa golpiar la llave que ta a una distancia de 14 m, clavada en suelu, ente les parés del caxón. Les partíes suelen disputase a 10 tiraes por xugador. Puen xugase d’un solu xugador escontra otru, lo que se denomina "mano a mano"; por pareyes, tercetos, cuartetos o quintetos.
· EL LIRIU
Nesti xuegu colócase un palu curtiu (delles veces llamáu “liriu”) en suelu y col palu más llargu (machorra) gólpiase per ún de los estremos, intentando llevantalu del suelu, pa golpialu nel aire. Gana’l que lu llance máslloñe dempués de trés rondes.
· LA RANA
Xuegu nel que cada xugador tien que tirar dende una distancia estipulada y meter la ficha na boca de la rana o n’otros furacos cercanos. La puntuación que s’otorga ye: 100 puntos na boca de la rana, 50 puntos nos furacos de delantre de la rana y 25 puntos nos d’atrás. Cada xugador llanza diez fiches per tirada. Si se pisa la raya, la ficha llanzada anúlase.
· LA RAYUELA
Nesti xuegu píntase una raya llarga en suelu y márcase la distancia de tiru. Cada xugador llanza una piedra tratando de que quede enriba de la raya o lo más próximo a ella. El ganador ye quien lo consiga.
· SANGRE.
Fórmase un círculu ampliu y ún de los xugadores diz: “¡Declaro la guerra al mio peor enemigu, que ye...!” y tira’l balón al aire, gritando’l nome d’otru xugador. Entós toos marchen menos esi xugador que s’acerca a coyer la pelota. Si la garra antes de que bote, na mesma situación vuelve llanzala y diz el nome d’otru xugador. Si toca’l suelu tien que garrala y dir al centru y gritar: “¡sangre!” o “¡bomba!”. Los demás aparen de correr y queden quietos. El que ta nel centru da tres pasos con/ensin carrera hacia ún de los xugadores y llánza-y el balón, que l’otru pue intentar esquivar pero ensin mover los pies. Si-y da, pasa a ser el xugador del centru, y sigue xugando o pasa a ser el del centru y dempués queda elimináu. Dependiendo de los sitios onde se xuegue pue asignase a cada xugador el nome d’un país o ciudá, pintar en suelu un círculu que ye l’espaciu del xugador, eliminar a los xugadores en dándo-yos y llanzándo-yos el balón, o establecer qu’antes d’eliminalu pase per trés fases: firíu, fíríu grave, muertu y ceniza.
· EL TIRU LA CUERDA.
Fórmense dos equipos de competidores que tiren per una cuerda con un pañuelu atáu xusto pela metá. Márcase una raya nel centru a l’altura del pañuelu y otres dos a l’altura de cada equipu. Cuando se dea una señal empecipien a tirar hasta qu’ún de los dos consiga que’l pañuelu sobrepase la marca del so llau.
· UN, DOS, TRÉS, PALOMBINA BLANCA YE / AL ESCONDERITE INGLÉS.
Un xugador ponse de cara a una paré y d’espaldes al restu de compañeros que se coloquen a una distancia determinada. Ensin miralos tien que dicir n’alto “Un, dos, trés palombina blanca ye”. Durante esti tiempu los demás xugadores puen avanzar hacia elli. El xugador que se queda tien que dicir la frase mui rápido y xirar pa cazar a dalgún compañeru moviéndose. Si llogra ver a dalgún mándalu atrás o elimínalu. Gana’l primer xugador que consigue tocar la paré. La frase que se repite pue variar según la zona: “un, dos, trés, sin mover los pies”, “un,
dos, tres, esconderite inglés, sin mover les manes nin los pies”, etc
· LOS ZANCOS.
Xuegu que consiste en percorrer una distancia lo más rápido posible xubíu a unos zancos. Les variantes d’esti xuegu díctales la maxinación de los xugadores: con estorbos, colos güeyos zarraos, per tiempos, a relevu, etc.
No hay comentarios:
Publicar un comentario